Այս դասի օգնությամբ սովորողը՝
կիմանա, թե ինչ է հանդուրժողականությունը
կհասկանա հանդուրժելու, համբերելու ու անտարբեր լինելու տարբերությունը
կհասկանա, թե ինչ է անհանդուրժողականությունը
կկարողանա տարբերել հանդուրժողականության առավել ընդունված ըմբռնումը
ժամանակակից փիլիսոփայական ըմբռնումից
կկարևորի հանդուրժողականության դերը ժողովրդավարական հասարակության
կայացման գործում
Ողջույն:
Անցած անգամ, երբ խոսում էինք հավասարության մասին, պարզեցինք, որ
մարդիկ խիստ տարբեր են թե՛ իրենց ֆիզիկական ու մտավոր կարողություններով, թե՛
իրենց խառնվածքով ու բնավորությամբ, թե՛ իրենց կարիքներով, ցանկություններով,
աշխարհի ընկալմամբ, թե՛ աշխարհից ու կյանքից ունեցած իրենց ակնկալիքներով և թե՛
այս ամենից բխող իրենց վարքով: Մարդկանց տարբերություններն ամեն պահ իրենց
զգացնել են տալիս: Մենք շատ հաճախ առնչվում ենք այնպիսի մարդկանց հետ, որոնք
ունեն մաշկի այլ գույն, պատկանում են այլ ազգության, դավանում են այլ կրոն, գուցե
ունեն սեռական այլ կողմնորոշում, կամ ուղղակի ունեն այլ՝ երբեմն ընդունված ձևին
չհամապատասխանող հագուստ, սանրվածք, շարժուձև: Մեզանից որոշակի
հատկանիշներով տարբերվող մարդիկ երբեմն կարող են դուր չգալ մեզ, նույնիսկ
նյարդայնացնել ու զայրացնել: Հարց է առաջանում, թե ինչպես պետք է վարվել այդպիսի
իրավիճակներում, որպեսզի մարդկանց տարբերությունների հանդեպ մեր պատասխան
վերաբերմունքը չփչացնի հասարակության առողջ ու ներդաշնակ մթնոլորտը: Այստեղ
մեզ օգնության է գալիս այսօր չափազանց կարևորվող և քարոզվող արժեք՝
հանդուրժողականությունը, որի մասին էլ կխոսենք առաջիկա մի քանի րոպեներին:
Եվ այսպես ի՞նչ է հանդուրժողականությունը, ե՞րբ է այն դրսևորվում, ո՞վ կարող է
այն դրսևորել, ի՞նչ կլինի, եթե հրաժարվենք հանդուրժող լինել: Ահա՛ այն հիմնական
հարցերը, որոնք կփորձենք առավելագույնս հասկանալի դարձնել մեզ համար:
Ի սկզբանե հանդուրժողականությունը ուներ շատ նեղ իմաստ: Լինել հանդուրժող
նշանակում էր հարգալից վերբերմունք դրսևորել այլադավանների, այսինքն՝ մեր կրոնից
տարբերվող կրոն դավանող մարդկանց հանդեպ: Հանդուրժողականությունը
հատկապես քարոզվում էր քրիստոնեական և բուդդիստական կրոններում: Նոր
ժամանակներում հանդուրժողականությունն ընդլայնեց իր ազդեցություն ոլորտը և
սկսեց տարածվել ոչ միայն կրոնական, այլև ռասայական, ազգային, քաղաքական
տարբերությունների վրա: Իսկ արդեն 20-րդ դարավերջին հանդուրժողականությունը
հռչակվեց ժամանակակից հասարակության համերաշխ գոյության անհրաժեշտ
պայման: Միավորված ազգերի կազմակերպությունը տվեց հանդուրժողականության
հետևյալ բնորոշումը՝
«Հանդուրժողականությունը քաղաքացիական հասարակության արժեք ու
սոցիալական նորմ է, որը դրսևորվում է քաղաքացիական հասարակության բոլոր
անդամների տարբեր լինելու, տարբեր կրոնական, քաղաքական, ազգային և այլ
սոցիալական խմբերի միջև կայուն ներդաշնակության ապահովման, տարբեր
մշակույթների, քաղաքակրթությունների և ժողովուրդների բազմազանության հանդեպ
հարգանքի, իրենց արտաքնով, լեզվով, համոզմունքներով, սովորույթներով ու
դավանանքով տարբերվող մարդկանց ըմբռնումով մոտենալու և նրանց հետ
համագործակցելու պատրասատակամության մեջ»:
1995 թվականից սկսած նոյեմբերի 16-ը ամեն տարի նշվում է որպես
հանդուրժողականության միջազգային օր: Ամեն տարի այդ օրը ևս մեկ անգամ
հիշեցնում են մարդկանց, թե որչափ կարևոր է հարգանք դրսևորել այլ մարդկանց
հանդեպ՝ անկախ նրանց ու մեր տարբերություններից, և որքան է տուժում ողջ
հասարակությունը, երբ շատանում են անհանդուրժողականության դրսևորումները:
Այս ամենը պարզապես հրաշալի է: Սակայն հանդուրժողականության և դրա
ընդունված մեկնաբանության հետ կապված բազմաթիվ հարցեր են առաջանում:
Հանդուրժողականության այս ընկալման հիմքում դրվում է այն գաղափարը, որ
աշխարհում ամեն ինչ հարաբերական է, որ չկա բացարձակ ճշմարտություն, ոչ ոք չի
կարող պնդել, որ տվյալ կրոնը, ազգությունը, մաշկի գույնը և այլն ամենալավն են, որ
տվյալ քաղաքական հայացքները ամենաճիշտն են, և ուրեմն՝ պետք է հանդուրժողաբար
վերաբերվել բոլոր կրոններին, ազգերին, ռասաներին, քաղաքական դիրքորոշումներին:
Սակայն այս դեպքում ստացվում է, որ հանդուրժողականությունը մնացած ամեն ինչի
նման նույնպես հարաբերական է, և որքան լավ է հանդուրժելը, այնքան լավ է նաև
չհանդուրժելը, և ուրեմն՝ մենք պետք է հարգենք նաև անհանդուրժողականությունը: Ինչ-
որ բան ինձ հուշում է, որ հանդուրժողականության այս ընկալումը վերանայման կարիք
ունի:
Արի՛ դիտարկենք մի շատ պարզ օրինակ: (Այստեղ մենք հղում ենք կատարում
ժամանակակից գերմանացի բարոյագետ Ռեյներ Ֆորսթին): Ձեր դասարանում հայտնվել
է մի նոր աշակերտ: Նրա անունը Թոմ է: Թոմը սևամորթ է: Ձեր դասարանի Արմենը,
մեղմ ասած, չի սիրում սևամորթներին: Նախկինում, երբ քաղաքում պատահաբար
հանդիպում էր սևամորթների, զզվանքով արագ-արագ անցնում էր նրանց կողքով՝
փորձելով հանկարծ չդիպչել նրանց: Իսկ հիմա սևամորթը եկել է ձեր դասարան և
նույնիսկ կարող է նստել Արմենի կողքին: Արմենի վիճակը, ինչ խոսք, նախանձելի չէ:
Ի՞նչ անել: Մի կողմից՝ Արմենը չի սիրում նրան, ավելի ճիշտ՝ նրա մաշկի գույնը, մյուս
կողմից՝ ուսուցիչները հորդորում են ձեզ այնպես անել, որ Թոմն իրեն օտար չզգա: Եվ
Արմենը՝ փորձելով լինել օրինակելի վարքի տեր աշակերտ, զսպում է իր բոլոր տհաճ
զգացողությունները և հնարավորինս լավ վերաբերվում Թոմին: Որքա՜ն գովելի են նրա
ջանքերը: Բայց նախքան Արմենին գովելը ուզում եմ մի բան հարցնել. իսկ Թոմը ի՞նչ է
արել, նա որևէ կերպ վնասե՞լ է Արմենին, խախտե՞լ է նրա որևէ իրավունքը: Չէ՞ որ
Արմենի՝ սևամորթներից զզվելու իրավունքը ոչ մի տեղ գրված չէ: Եթե Թոմը չի գործել
որևէ արարք, որով վնաս է հասցրել անձամբ Արմենին և ձեր ողջ դասարանին, ի՞նչ է
նշանակում հանդուրժել Թոմին: Թոմը մարդ է, որը, ինչպես բոլորս, ի ծնե օժտված է
անօտարելի իրավունքներով ու ազատություններով, և, եթե հիշում ես, մեր առաջին
հանդիպման ժամանակ, մենք նշեցինք, որ այդ իրավուքներով օժտված են բոլորը՝
անկախ իրենց ազգային, կրոնական, սեռական և, ուշադրություն, ռասայական
պատկանելությունից: Եվ ուրեմն՝ Թոմը քեզ ու ինձ հավասար մեկն է, նա
հասարակության լիիրավ անդամ է, ճիշտ այնպես, ինչպես դու, ինչպես Արմենը և այն, որ
նրա որևէ կոնկերտ հատկանիշ Արմենին դուր չի գալիս, ոչ թե Թոմի, այլ հենց Արմենի
խնդիրն է: Ես չեմ գովի այն, որ Արմենը Թոմին չի վիրավորում, չի վնասում, քանզի նա
որևէ իրավունք չունի այդպես վարվելու: Այս օրինակը, այսպիսով, օգնում է հստակեցնել
հանդուրժողականության իմաստը: Հանդուրժողականությունը ուղղված է միայն այն
երևույթին, ինչը սկզբունքորեն անհանդուրժելի է, այլ կերպ՝ բացառապես վատ, սխալ,
անբարո, անօրինական, հասարակությանը որոշակիորեն վնասող երևույթների դեմ: Մեր
օրինակում՝ սևամորթ լինելը ոչ վատ է, ոչ սխալ, ոչ էլ անօրինական:
Երկրորդը, ինչի վրա կուզեի հրավիրել ուշադրությունդ, այն է, որ ինչ-որ սխալ,
վատ, անօրինական բան հանդուրժելը զուտ կամավոր գործողություն է: Դու հիշում ես,
որ կամավոր ասելով հասկանում ենք, որ մարդն ազատ է և կարող է վարվել նաև այլ
կերպ: Այսինքն՝ որպեսզի դու հանդուրժես ինչ-որ բան, դու պետք է հնարավորություն
ունենաս չհանդուրժելու, բայց կամավոր կերպով որոշես այնուամենայնիվ հանդուրժել:
Պատկերացնենք՝ կողոպտիչները ներխուժել են բանկ և պատանդ վերցրել
աշխատակիցներին: Նրանց արարքը անօրինական ու անբարոյական է, հետևաբար՝
անհանդուրժելի: Սակայն աշխատակիցները չեն պատժում նրանց: Մի՞թե նրանք
հանդուրժող են գողերի նկատմամբ: Իհարկե ո՛չ: Պարզապես նրանց կյանքը վտանգված
է և նրանք ոչ թե հանդուրժում են, այլ ստիպված համբերում կամ դիմանում, քանզի
չունեն այլ ելք: Այստեղ չկա կամքի ազատություն, ուրեմն չկա նաև
հանդուրժողականություն:
Երրորդը, ինչ պետք է իմանանք հանդուրժողականության մասին այն է, որ ես
կարող եմ ասել, թե հանդուրժել եմ որևէ սխալ արարք միայն այն դեպքում, եթե այդ
արարքը հետաքրքրում է ինձ և ես դրա հետ համաձայն չեմ: Ենթադրենք, քայլում ես
փողոցով և տեսնում, թե ինչպես է մի մարդ մեծ ախորժակով պաղպաղակ ուտում և
բավական չէ, որ քեզ չի հյուրասիրում, դեռ համարձակվում էլ է պաղպաղակի թուղթը
գցել գետնին: Բոլորս կհամաձայնենք, որ այստեղ գործ ունենք վատ արարքի հետ: Դու
բոլոր իրավունքներն ունես նկատողություն անելու այդ մարդուն կամ, եթե դա օրենքով
նախատեսված է, ոստիկան կանչելու և օրենքով պատժելու նրան՝ ստիպելով վճարել
տուգանք միջավայրն աղտոտելու համար: Դու որոշում ես չանել ո՛չ մեկը, ո՛չ մյուսը:
Մենք կասենք, որ դու չպատժեցիր այդ մարդուն հանդուրժողականությունից դրդված
միայն այն դեպքում, եթե դու իսկապես անհանգստանում ես միջավայրի աղտոտման
համար: Եթե քեզ համար լրիվ միևնույնն է, թե փողոցում ով ինչ կթափի, այսինքն՝ եթե
դու այս հարցում անտարբեր ես, և առավել ևս, եթե դու էլ ես պաղպաղակի թուղթը գցում
գետնին, այսինքն, չնայած, որ այդ արարքը վատն է, բայց դու համաձայն ես այդ արարքի
հետ, այստեղ չկա հանդուրժողականություն: Ուրեմն՝ հանդուրժողականությունը չի
ենթադրում անտարբերություն և համաձայնություն:
Չորրորդ: Քիչ առաջվա օրինակում ասացինք, որ դու կարող էիր պատժել մարդուն
իր սխալ արարքի համար, սակայն որոշեցիր չանել դա՝ դրսևորելով
հանդուրժողականություն: Եթե հանդուրժողականությունը համարվում է
առաքինություն, այսինքն՝ դրական բարոյական որակ, հարց է առաջանում, ինչու մեկը
ով բարոյական է և օրինապաշտ, չպետք է պատժի մի արարք, որը հակասում է թե՛
բարոյականությանը, թե՛ օրենքին: Չէ՞ որ ստացվում է, որ դրանով մենք խրախուսում ենք
անբարոյականության և անօրինականության տարածումը: Իրականում
հանդուրժողականություն դրսևորելիս պետք է վստահ լինենք, որ այդպես մենք ավելի
մեծ օգուտ ենք տալիս թե՛ տվյալ մարդուն, թե՛ ողջ հասարակությանը, քան այն դեպքում,
երբ պատժում ենք: Հանդուրժողականության նպատակը կարող է լինել, օրինակ, վատ
արարք գործած մարդուն հետագայում ուղղվելու հնարավորություն տալը,
հասարակության մեջ այլ մարդու վիճակի մեջ մտնելու, նրան ապրումակցելու
սովորություն առաջացնելը: Պատիժը հաճախ ավելի ագրեսիվ է դարձնում մարդկանց,
մինչդեռ հանդուրժողականությունը օգնում է վերանայել իրենց վարքը:
Այժմ, երբ իմացանք որոշ բաներ հանդուրժողականության մասին, հասկանանք
նաև դրա հակառակ երևույթը՝ անհանդուրժողականությունը: Հանդուրժողականությունը
երբեք չի նշանակում անգործություն: Վերադառնանք մեր աղբ թափողին: Եթե դու
այնուամենայնիվ որոշես նկատողություն անել այդ մարդուն, դա բավարար չէ, որպեսզի
քեզ համարեն անհանդուրժող: Դու կարող ես շատ հանդուրժող լինել և զերծ մնալ
մարդուն պատժելուց, բայց եթե պատժես էլ, չես դառնա անհանդուրժող: Բայց կա մի
կարևոր կետ. եթե պատժես օրենքի սահմաններում: Եթե օրենքը քեզ թույլ է տալիս դիմել
ոստիկանին, դու կարող ես դա անել, սակայն եթե վերցնես նրա թափած աղբը և լցնես
նրա վրա, որպեսզի սեփական օրինակով հասկանա, ինչ վատ բան է կեղտոտվելը, կամ
հարձակվես ու ծեծես այդ մարդուն, դա կլինի անհանդուրժողականություն: Այսպիսով՝
անհանդուրժողականությունը սխալ, վատ, անօրինական արարքին նույն կերպ սխալ,
վատ, անօրինական արարքով պատասխանելն է, այլ ոչ թե ուղղակի պատասխանելը:
Ամփոփենք: Այսօր խոսեցինք հանդուրժողականության մասին: Տեսանք, որ այն
հիմնականում ընկալվում է որպես հարգանք տարբերությունների նկատմամբ:
Հասկացանք, որ այդ ընկալումը այնքան էլ հիմնավոր չէ, որ հանդուրժել կարելի է միայն
վատ երևույթը, որ մենք հանդուրժող ենք, եթե կարող ենք չհանդուրժել, բայց կամավոր
ընտրում ենք հանդուրժելը, որ հանդուրժողականությունն անտարբերությունը չէ և
վերջապես՝ հանդուրժողականությունը նպատակ ունի ավելի լավը դարձնել առանձին
մարդուն և ողջ հասարակությունը: Հանդուրժող լինենք
Առայժմ: